Ka auraki anō te kaupapa pukuhohe angitu i te rauna reo Māori ngātahi o te tau 2026

E whā ngā kaupapa, pukuhohe mai, whakaari mai, pakipūmeka mai anō, ka whāngaia ki te pūtea kia nui ake ai te reo Māori ki runga mata whakaata.

Tekau katoa ngā tono kaupapa i tae mai ki tēnei rauna, whakaari tuhituhi mai, kaupapa pono mai anō. E rua ngā kaupapa i whai pūtea waihanga i te whakaari tuhituhi, e rua atu anō ngā kaupapa pono i whai pūtea. I tuwhera te rauna pūtea ngātahi nei, e $8miriona te nui, i te marama o Ākuhata 2026, me te whai kia taunakitia he kaupapa pāho reo Māori he nui te kounga, hei kai mā te minenga whānui. Me 30 ōrau rawa, neke atu rānei te nui o te reo Māori ki ia o ngā kaupapa.

Kua whakapūmautia tētahi terenga tuatoru o te whakaari tuhituhi pukuhohe o Dead Ahead, tērā e kitea ana tōna angitu i te pakari o te manawa ū o te minenga ki tōna terenga tuatahi. O ngā hōtaka i whāngaia ki te pūtea, i mātakina tononoatia hoki ki ngā pae a Te Reo Tātaki, otirā, i tautokona e Irirangi Te Motu, e Te Māngai Pāho anō, koinei te terenga i nui katoa ngā mātakitanga i te tau pūtea 2025/26. E 852,900 ngā kitenga ōna ki TVNZ+.

I whāia hoki te terenga e Netflix i Aotearoa me Ahitereiria, i reira ka noho koia tētahi o ngā terenga e toru toa i kaha te mātakina ki taua pae.

E ono ngā puni o te terenga hou, ka 40 ōrau te nui o te reo Māori o roto, ā, ko tāna he kawe tonu i ngā kōrero mō te ao o te whānau Wharekoa. Ka rewa te terenga tuarua ki TVNZ+ ā te 3 o Noema.

He pūtea whakaari tuhituhi hoki i riro i te kaupapa o Wharekura. He terenga rangatahi hou tēnei mō runga o Māori+ me Whakaata Māori. Kīia ana he Glee Māori mō te reanga hou, mā tēnei terenga whakatōpūngia ai ko te reo Māori, ko te kapa haka, ko te puoro, ko ngā kōrero mō te rangatahi ā mohoa nei, ka mutu, ko te tūranga whakaari, ko te kura. He tuatahitanga tēnei kokenga mā Mahi Tahi Media ki te ao whakaari tuhituhi.

Ki ngā kaupapa pono, ko Beyond Identity tērā ka whai haere i ētahi uri tokowhā nō Aotearoa kua hau nei ngā rongo. Kei ētahi taumata rerekē tērā me tērā i ō rātou haerenga i te ao Māori, nō rātou ka kimi māramatanga ki ngā take i wetekina ai ngā here ki ō rātou tuakiri Māori. E whā katoa ngā puni o tēnei terenga, ka whakaatu i te whai kia renarena anō ngā taura herehere ki te whakapapa, ki te whenua, ki te whānau, ki te hītori, otirā, ki te reo me ngā tikanga Māori.

Ka koke tonu a Origins ki tōna terenga tuawhā, i a Scotty Morrison ka ārahi i ngā minenga ki te Aotearoa o ngā rautau 16, 17 hoki. Ko te whakapapa, ko ngā kōrero tuku iho, ko te mātai whaipara tangata hei mātāpuna mātauranga, ko tā te terenga pakipūmeka nei e toru ōna puni he pātai: nā te aha te Māori i Māori ai?

“E kitea tonutia ana ngā hua ngātahi ka puta i tō māua piringa mauroa ko Te Māngai Pāho – he kaupapa rongomaioro, mā konei tukuna atu ai te kaupapa pāho reo Māori ki te minenga whānui,” ko tā te Tumu Whakarae o Irirangi Te Motu, ko tā Cameron Harland. Hei tāna anō, “Ko tā te rauna o tēnei wā he hāpai tonu i aua hua angitu, i te taunakitia o ētahi tino kaupapa kua whai huruhuru anō, tae atu hoki ki ētahi kaupapa hou, mā reira ka nui ake ngā ara e wātea ana ki ngā minenga kia rangona ai, kia kaingākautia anō ai te reo Māori i te mata whakaata.”

“Mā tō māua piringa tuku pūtea ngātahi ko Irirangi Te Motu e taea ai te waihangatia mai o ētahi kaupapa pāho reo Māori he nui te kounga, mō runga i ā tātou mata whakaata. Ko tā ngā kaupapa e whā i angitu i tēnei rauna he whakamārama, he whakangahau hoki i ngā minenga ki te kaupapa pāho, nō te reo Māori e whakanuia ana, nō te haumako me te kanorau hoki o ā tātou kōrero me ō tātou reo e whakatairangatia ana,” ko tā te Kaihautū o Te Māngai Pāho, ko tā Larry Parr.

E $7,934,130 te tapeke o ngā pūtea ka riro i ngā kaupapa e whā, whakaari tuhituhi mai, kaupapa pono mai anō.

Ngā Whakatau Tuku Pūtea

Katoa, katoa te haupū pūtea he mea wehe 50/50 e Te Māngai Pāho me Irirangi Te Motu.

Hei whakamārama: Katoa ngā herenga pūtea he mea whiriwhiri i ngā tono i tau mai ki a mātou, ka mutu, me mana ngā kirimana i te wā e tika ana. Ka putuputu te tuku i te pūtea, e ai anō ki te whakatutukihia o ngā here ā-kirimana. Ko ngā pūtea ka herea engari kāore e mana i te kirimana i te wā e tika ana, ka whakahokia mai, ka tohaina mā rauna pūtea kē atu.

Kaupapa Whakaari Tuhituhi:

• Dead Ahead 3, 6 x 22’, nā HiMama hei mātakitaki i TVNZ+, tae atu ki te $3,296,828
• Wharekura, 8 x 12’, nā Mahi Tahi Media hei mātakitaki i Māori+ me Whakaata Māori, tae atu ki te $1,976,682

Kaupapa Pono:

• Beyond Identity, 4 x 44’, nā Pango Productions hei mātakitaki i Three, ThreeNow, Neon me Sky, tae atu ki te $1,015,620
• Origins 4, 3 x 43’, nā Scottie Douglas Productions hei mātakitaki i TVNZ 1 me TVNZ+, tae atu ki te $1,645,000