E pāhotia ana e Irirangi Te Motu me Te Māngai Pāho ngā kaupapa Whakaari e ita nei te reo Māori me ngā kaupapa Māori, i puta i te rauna tuku pūtea ngātahi.

Kua pāhotia e Irirangi Te Motu | NZ On Air me Te Māngai Pāho ngā kaitono angitu mō te rauna tuku pūtea ngātahi a Te Māngai Pāho me NZ On Air, e arotahi nei ki ngā kaupapa Whakaari e ita nei te reo me ngā kaupapa Māori, mā ngā kaimātakitaki whānui.

I tēnei rārangi, ko tā Warner Brothers Discovery Whakaari tuatahi 30% te reo Māori ka pāhotia i te hāora paerangi.

I tuwhera te rauna tuku pūtea ngātahi i te Tīhema 2023 e pōhiri ana i ngā tono ka eke te pūtea tōpu ki te $8m, e whakamātāmuahia ana ko ngā kaupapa Whakaari reo Māori kounga.

“I kitea i tētahi rangahau, 70% o ngā tukuhanga pūtea ka tukuna ki ngā kamupene pāpāho Māori e ngā umanga tuku pūtea whakaata, ka tukuna ki ngā kaupapa Kōrero Pono,” tā Amie Mills, Tumuaki o ngā Take Pūtea, Irirangi Te Motu. “I te aro te rauna tuku pūtea ngātahi o te tau nei ki te whakautu i tērā tīkokinga, ki te whakapūahoaho hoki i te māramatanga ki te kounga o tā ō tātou kaiwaihanga Māori eke i te wāhi ki te toi whakaari.”

25 katoa ngā tono i tonoa ki te rauna – e whā i whakawhiwhia ki te pūtea waihanga kaupapa, e rima i whakawhiwhia ki te pūtea whakawhanake, nā, ka eke te tōputanga o te tukuhanga pūtea ki te $10,160,243.

“Katoa ēnei tono he ita te reo, he ita hoki ngā kaupapa Māori, e āpiti noa nei ki te wāriu nui ā-kaupapa, me tētahi pae auaha kounga,” tā Larry Parr, Kaihautū, Te Māngai Pāho. “Ka kore noa iho e pā motuhenga nei ki ngā kaimātakitaki, engari kia whakatipu hoki i ngā pūkenga o te rāngai ki te waihanga i ngā kaupapa Whakaari Māori kounga.”

Ko te Whakaari hāora paerangi tuatahi a Warner Bros. Discovery 30% te reo Māori, ko Tangata Pai. He terenga whakaari mā ThreeNow me Three, he pūrākau mō ngā tāngata e rima i tō rātou hāora tuamatangi i mua i te pahūtanga o tētahi pahū i tētahi porotēhi Māori.

He terenga kua whakaaawetia e te kōrero pono a Rapunga the Hunt, he terenga whakaari mā Māori+ me whakaata Māori e whai ana i tētahi kāhui kanorau o ngā Māori noho tāone ka tūpono ki te taiwhenua o te Tai Tokerau. Ko ētahi i kōwhiri kia tau ai ki reira, ko ētahi kāhore he kōwhiringa kē atu, engari katoa rātou kei tawhiti i te hāneaneatanga.

I waihangahia mā te rangatahi mō te rangatahi, he terenga whakaari a Kupu X i a Kahu Smith ka wetewete i ngā kaupapa porehu o tōna wā kāinga i te TikiToke, hei ārai mō āna rangahau mō te ngarohanga o tōna whaea. Nā āna rangahau, ka tae ia ki te tāone o Urutomo, i reira ka tūtakina a Tomai Stone, ko tōna tauaro, ko tōna ara hoki pea ki te pono. Ka pāhotia a Kupu X i ngā paepāho maha, i Whakaata Māori, TikiToke me TiriAta.

He whakaari pukuhohe a Dead Ahead mā TVNZ+ me TVNZ 2, i whai pūtea whakawhanake i te rauna tuku pūtea ngātahi 2023. Ka whāia te whānau Wharekoa ka hoki mai ana ki Aotearoa i tā rātou noho ki tāwāhi mō te tekau tau. Ka tūpono rawekehia e Kiri Wharekoa te ārai o te ao wairua me te ao kikokiko, ka puta mai ai ētahi kēhua e whā ki te whare Wharekoa.

I whakawhiwhia e ngā kaupapa e rima ki te pūtea whakawhanake i tēnei rauna tuku pūtea ngātahi te $139,910, ā, ka maha ake ngā kaupapa whakahihiko ngākau ka whakawhanakehia mā ngā kaimātakitaki i Aotearoa.

Ngā Whakatau Pūtea

Ko te wāhitanga o te tukunga pūtea kei tōna 60/40 i waenganui i a Te Māngai Pāho me Irirangi te Motu

Kia mōhio: Ka ū te tukuhanga o ngā pūtea i runga i ngā tono i tae mai, ā, me mana te kirimana i roto i tētahi wā kua tohua. Ka tatū ana he herenga kirimana, koirā anake te wā ka puta he kete pūtea. Mō ngā pūtea e ū ana, heoi, ka kore te kirimana e mana i roto i te wā i tohua, ka whakahokia, ka tukuna ki kaupapa kē hei ngā rauna tuku pūtea e tū mai nei.

KAUPAPA WHAKAARI

• Tangata Pai, 8 x 44’, nā Green Sugar Media hei mātakitaki i ThreeNow me Three, tae atu ki te $3,990,000
• Dead Ahead, 6 x 22’30”, nā HiMama hei mātakitaki i TVNZ+ me TVNZ 2, tae atu ki te $2,893,133
• Rapunga The Hunt, 6 x 26’, nā Cinco Cine Film Productions hei mātakitaki i Māori+ me Whakaata Māori, tae atu ki te $2,185,920
• Kupu X, 6 x 15’, nā Adrenalin Group hei mātakitaki i Whakaata Māori, TikTok me YouTube, tae atu ki te $951,280